Rekreá i reuní aun mas na Nieuw Amsterdam, Boneiru EKREÁ I REUNÍ AUN MAS NA NIEUW AMSTERDAM, BONEIRU
Rekreá i reuní aun mas na Nieuw Amsterdam, Boneiru EKREÁ I REUNÍ AUN MAS NA NIEUW AMSTERDAM, BONEIRU
![](https://static.wixstatic.com/media/ed029c_d9d650051efe4952b49201e9febd839a~mv2.jpg/v1/fill/w_980,h_653,al_c,q_85,usm_0.66_1.00_0.01,enc_auto/ed029c_d9d650051efe4952b49201e9febd839a~mv2.jpg)
Mart 2022
Ta bin un sitio nobo pa rekreá i reuní ku otro na Nieuw Amsterdam, Boneiru. Riba djabièrnè 11 di mart Fundashon Cas Bonairiano, ministerio di VWS i Jantje Beton a duna lus bèrdè pa huntu ku abitantenan di e bario, desaroyá e sitio nobo akí. Ta pa di promé bia ku Jantje Beton ta desaroyá un lugá pa rekreá den e parti Karibense di Reino. Entrante komienso di 2023, grandi i chikitu por hasi uso di e lugá akí.
Ta mas ku nesesario pa bin ku un lugá nobo i agradabel den e bario nobo di Nieuw Amsterdam. Ben Oleana, direktor di Fundashon Cas Bonairiano: “ya pa algun tempu kaba e idea pa bin ku e lugá akí ta tópiko di kombersashon ku Jantje Beton i ministerio di VWS. Pasobra na e momentunan akí no tin lugá den Nieuw Amsterdam kaminda tur mucha por rekreá sin preokupashon i abitantenan di bario por topa otro. Muchanan ta rekreá riba kaya meimei di outo, loke ta peligroso i ta kousa molèster.”
Tráfiko di outo, kachó di kaya i dibertishon digital
Miranda Verburg (Jantje Beton) durante su bishitá na Boneiru a mira di aserka kon e isla ta lucha ku entre otro e aspekto di salú: “E posibilidatnan pa rekreá i move den serkania kaminda ta biba ta limitá na Boneiru. Miéntras ku nèt esei ta asina importante pa bo por desaroyá bo mes salú komo mucha. Tantu mucha komo adulto ta bisa ku e bario ta ofresé muchu tiki aktividat i muchu tiki reto pa rekreá. Esei ta pone ku ta muchu mas atraktivo pa muchanan keda kas i hunga tras di un pantaya debí ku nan ta fèrfelá nan mes. Tambe muchanan ta dependé di nan mayornan pa por move den e bario. Tráfiko di outo i kachó di kaya ta forma un opstákulo pa mucha ora di rekreá pafó. P’esei ta asina importante ku ta bin ku un lugá di rekreá bunita kaminda tur hende por dibertí nan mes i ku ta pone ku keda sinta paden ta bira ménos opvio. Nos no kier nada otro ku konsentrá nos mes riba e deseonan di e mucha- i demas abitantenan.”
Ta djis e komienso
Motibu sufisiente pa Abigail Norville, sekretario general suplente di ministerio di Salubridat, Bienestar i Deporte (VWS), laga e deseo bira realidat. Di manera ku e añanan benidero ta posibel pa rekreá na muchu mas sitio na Boneiru i Hulanda Karibense, i abitantenan di bario por topa otro na un sitio agradabel: “Nos ta hopi kontentu ku e lugá di rekreá nobo i bunita akí ta bin na Boneiru. Nos ta trahando duru huntu ku e otro partidonan lokal pa realisá mas lugá pa rekreá na Hulanda Karibense. Pero promé nos ta kuminsá traha huntu den Nieuw Amsterdam!”
![](https://static.wixstatic.com/media/ed029c_d9d650051efe4952b49201e9febd839a~mv2.jpg/v1/fit/w_207,h_206,q_75/ed029c_d9d650051efe4952b49201e9febd839a~mv2.jpg)
![](https://static.wixstatic.com/media/ed029c_35fe5b94c87446e893e7bf78bcf907eb~mv2.jpg/v1/fit/w_207,h_206,q_75/ed029c_35fe5b94c87446e893e7bf78bcf907eb~mv2.jpg)