Proyekto di kas pa hendenan ku kondishon spesífiko
![](https://static.wixstatic.com/media/ed029c_175ee00f21ff42af956aea7958f1542a~mv2.jpg/v1/fill/w_980,h_735,al_c,q_85,usm_0.66_1.00_0.01,enc_auto/ed029c_175ee00f21ff42af956aea7958f1542a~mv2.jpg)
Aprel 2024
Fundashon Cas Bonairiano (FCB), ku sosten di Entidat Publiko Boneiru, Ministerio di BZK i 14 diferente organisashon na Boneiru a uni pa realisá un proyekto pa bibienda pa personanan ku ta den un kondishon spesífiko.
E proyekto di kas pa hendenan ku kondishon spesífiko aki ta kanando pa 2 aña kaba. Na aña 2022 tabatin un konferensia di 5 dia kaminda representantenan di diferente organisashon ku ta traha den diferente área di bienestar sosial a bini huntu. Meta di e konferensia tabata pa a papia riba e tópiko di bibienda pa kas pa un grupo di persona ku pa motibu di un situashon spesífiko ku nan tin, ta konfrontá hopi difikultat pa haña un kas di hür pa biba aden.
Na final di e konferensia a fiha kuater grupo di hendenan ku kondishon spesífiko. Nan ta èks detenido, personanan ku a bira víktima di violensia doméstiko, studiantenan di MBO i personanan ku un problema sikiátriko. Aparte ku e hendenan ta kai bou di un di e kuater grupo menshoná nan lo mester tin algun otro rekisito tambe aserka, ku lo mester a keda deliñá mas den detaye. E palabrashonnan a keda presentá den un akuerdo di intenshon ku e tempu ei Fundashon Cas Bonairiano, diputado Nina den Heyer i representantenan di e 14 organisashonnan a firma.
Entre 2022 i awor diferente trabou organisatorio a keda hasí. Entretantu tin finansiamentu risibí for di Ministerio di BZK, Hulanda, pa konstrukshon di 17 kas pa e proyekto aki. A nombra un kordinadó spesial pa guia e proseso di e proyekto kende a reuní ku diferente partnernan pa a kaba deliñá e detayenan ku tabata falta pa kada grupo individual. Planifikashon pa modelo di kas i unda lo bai konstruí e kasnan tur a keda fihá. Bunita di e proyekto aki lo ta ku no ta bai traha un bario pa e grupo aki so biba huntu ku otro, e hendenan lo bai biba den kasnan nobo konstruí den e diferente barionan komun. E konstrukshon ta den man di e kompania Veerhuis Bouwsystemen BV. Dia 18 di aprel 2024 a firma e kombenio di konstrukshon pa traha e 17 kasnan.
Ta importante pa hasi menshon ku e proyekto aki tin algun aspekto úniko. Pa menshoná esun di mas importante ku ta konta pa tur kuater grupo ta ku e kas ta mará na un plan di guia. Pa e persona bin na remarke e mester ta den un proseso di guia o mester ta dispuesto pa sigui un proseso di guia na un instansia ku lo keda palabrá kun’e. Pa e motibu aki den e proyekto un hende mes no por hasi petishon na FCB pa un kas, su petishon mester pasa via di un di e 16 instansianan ku a firma e kombenio na konferensia di aña 2022. E di dos eksigensia ku ta konta pa tur e kuater gruponan ta ku e persona ta haña un kas pa e periodo ku e proyekto ta stipulá. Durante di e periodo e persona o famia ku haña e kas ta obligá na partisipá na e plan di guia ku lo traha kun’é. Na momentu ku e persona faya ku kumplimentu di e plan lamentablemente e ta pèrdè derechi di keda biba den e kas.
Komo prueba pa funshonamentu di e proyekto ya FCB for di bibiendanan eksistente a hasi entrega di e promé kas na un siudadano i simbólikamente diputado Den Heyer huntu ku Silvana Janga Serfilia a risibí un yabi markando inisio di e proyekto.
Fotonan ta ilustrá entrega simbólikamente di e yabi komo inisio di e proyekto i tambe firmamentu di e kombenio di konstrukshon di e 17 kasnan. FCB ta keda ku bista riba nesesidat ku ta biba den pueblo pa loke ta trata bibienda popular.
![](https://static.wixstatic.com/media/ed029c_78ba155dbdca46d0b41863be8fdcc9c9~mv2.jpg/v1/fit/w_207,h_206,q_75/ed029c_78ba155dbdca46d0b41863be8fdcc9c9~mv2.jpg)
![](https://static.wixstatic.com/media/ed029c_175ee00f21ff42af956aea7958f1542a~mv2.jpg/v1/fit/w_207,h_206,q_75/ed029c_175ee00f21ff42af956aea7958f1542a~mv2.jpg)
![](https://static.wixstatic.com/media/ed029c_4b29e442c0734bfd8b6a9c2acf0be404~mv2.jpg/v1/fit/w_206,h_206,q_75/ed029c_4b29e442c0734bfd8b6a9c2acf0be404~mv2.jpg)
![](https://static.wixstatic.com/media/ed029c_3c32ebbc6abb47e2a1def4f42eac24bb~mv2.jpg/v1/fit/w_207,h_206,q_75/ed029c_3c32ebbc6abb47e2a1def4f42eac24bb~mv2.jpg)