E nesesidat kresiente pa yudansa sikológiko ta bini prinsipalmente dor di e kresementu di e kantidat di habitantenan di Boneiru den kombinashon ku un oumento di problema sosial manera pobresa. MHC ta notando ku mas i mas habitantenan di Boneiru ta desaroyá problema sikiátriko serio debí na pobresa. Esaki ta trese kuné situashonnan tristu, no solamente den e aspekto material, pero tambe den e aspekto sikológiko. Esaki debí na preokupashonnan tokante debe, pero tambe pasobra ku pobresa ta kontribuí na oumento di negligensia, abusu doméstiko i abusu seksual.
Un motibu mas positivo pa e demanda kresiente pa sosten sikológiko ta ku e hende a bira mas konsiente tokante salú mental i e tabú pa esaki ta bira ménos. E hende ta opta pa buska yudansa mas lihé den sierto situashonnan. E demanda kresiente aki ta nifiká ku tin mester di mas trahadó tambe. Pa e motibu aki, MHC i Fundashon Cas Bonairiano (FCB) a firma un akuerdo djamars siman pasá durante un reunion festivo pa konstrukshon di un edifisio nobo na Boneiru. E direktornan di ámbos organisashonnan a enfatisá e urgensia pa e edifisio nobo ku mester bai realisá. “Ku e konstrukshon di e edifisio nobo nos por mehorá i hasi e kuido di salú mental pa e habitantenan di Boneiru mas aksesibel”, segun Erik Jansen, direktor di MHC.
E edifisio nobo lo ta un ofisina konosí komo un FACT-kantor. Esaki ta nifiká ku e team ku lo traha den e edifisio lo tin e FACT ‘keurmerk’. FACT ta para pa Flexible Assertive Community Treatment, ku ta nifiká ku diferente profeshonal den kuido ta traha huntu den un team multidisiplinario. Sikólogo, sikiatra i otro profeshonalnan lo ta duna guia na hende ku tin problema di adikshon òf un desórden sikiátriko serio, den nan sirkulo familiar. Miembronan di famia i tambe sernan kerí di e kliente ta ser inkluí den e proseso di tratamentu i e kliente lo haña sosten pa kana e kaminda nesesario pa eventualmente por regresá i partisipá bek den e komunidat.
Foto: Gerente di FCB, sr. Ben Oleana i gerente di MHC, sr. Erik Jansen ta pone nan firma bou di e akuerdo.