Riba 11 di mart 2022 Fundashon Cas Bonairiano (FCB) i Salubridat Públiko, Bienestar i Deporte (VWS) a firma un konvenio pa konstrukshon di un fasilidat residensial pa alohá biba bou di guia strukturalmente. E fasilidat residensial akí ta partikularmente pa hóbennan di 16 t/k 23 aña di edat, prosedente di Boneiru, Saba i Sint Eustatius, ku ta den un trayekto di yudansa di durashon largu i ku ta kla pa un siguiente paso riba e kaminda pa mas independensia.
Na biba bou di guia tin lugá pa 13 hóben, di kua na e momentunan akí 12 lugá ta okupá. Banda di bai skol òf traha partaim, ta guia e hóbennan riba diferente áreanan di bida. Tur esaki ta sosodé den estrecho kooperashon ku e partnernan di kadena di ZJCN, manera Expertisecenter Onderwijs Zorg, Komunidat di Skol Boneiru, Mental Health Caribbean, Fundashon Rosa di Sharon i Fundashon Proyekto, pa promoshon di e proseso pa bira independiente.
Denise Crestian-Coffie (Fundashon Cas Bonairiano): “E proyekto akí ta mas ku solamente un edifisio; e ta un promesa i un futuro yen di speransa pa e hóbennan ku ta bai haña nan hogar akí. E kos bunita ta, ku FCB no a pèrkurá solamente pa nan aktual lugá di biba, pero a stipulá palabrashonnan tambe, ku esnan ku finalisá e trayekto di biba bou di guia ku éksito, por pasa pa kasnan sosial normal di FCB. Ku esaki ta brinda e hóbennan un perspektiva pa futuro ku bista riba un bida independiente.”
Regiline Sambo: “Ku e paso nobo akí nos ta konstruyendo un futuro den kua kada hóben ta haña oportunidat pa desaroyá su mes kompletamente i konstruí un bida independiente. Huntu nos ta krea un ambiente den kua tur hende ta sinti ku ta mira i ta sostené nan. E kooperashon ku otro organisashonnan di ayudo ta hunga un papel krusial den e proseso di e hóbennan riba nan kaminda pa bira independiente.”
Residente mas hoben:“Ora mi a kuminsá ku BWB, semper mi tabata agresivo, rabiá. Pero BWB a kambiá mi hopi. Ainda mi ta un tiki rabiá ku tur e otro kosnan, pero mi ta hopi mas felis i mas orguyoso di mi mes pa kon largu mi a kambia i pa kon leu mi a kambia. Mi ta kere ku algun di e kosnan ku mi a kambia ta: mi a haña mi pèrmit di nabegá, mi a haña mi 'open water' i mi a haña un trabou i mi a siña kon pa ta mas independiente."