Fundashon Cas Bonairiano ta urgi su klientenan pa registrá nan Mi FCB riba su wèpsait promé ku 1 di desèmber 2022
![](https://static.wixstatic.com/media/ed029c_f9ed26f8e47a4f25bda202802f17b29b~mv2.jpg/v1/fill/w_980,h_583,al_c,q_85,usm_0.66_1.00_0.01,enc_auto/ed029c_f9ed26f8e47a4f25bda202802f17b29b~mv2.jpg)
Sèptèmber 2022
Na komienso di mei den e aña aki Fundashon Cas Bonairiano, den era nobo pa outomatisá su servisionan a lansa su wèpsait nobo www.fcb.live ku ta aksesibel na Papiamentu i tambe Hulandes pa un i tur ku kier sa mas tokante di FCB.
Tambe a organisá un “media tour” pa informá di e importansia ku e registrashon via wèpsait aki tin i urgi tur su buskadó i hürdónan di kas pa subi e wèpsait i aktivá nan kuenta di Mi FCB. Banda di informashonnan general esnan riba lista di espera pa un kas i tambe e hürdónan di kas di Fundashon Cas Bonairiano mester registrá promé ku 1 di desèmber 2022 via di e wèpsait. Ta importante pa klientenan ta konsiente di e importansia pa registrá via e Mi FCB. Na momentu ku un kas bira bashí i ta disponibel pa sea hür òf benta FCB lo no yama e buskadó di kas mas. Mediante di su registrashon via Mi FCB e buskadó di kas mes mester subi, mira e kas(nan) disponibel i reakshoná riba e kas ku e ta deseá. Kada kas lo tin e foto, informashon i kondishonnan deskribí pa por bin na remarke pa e kas. Hasi re-inskripshon un biaha pa aña, hasi kambio di datos personal si esaki ta nesesario i tur otro servisionan di FCB lo ta aksesibel via di Mi FCB. Fundashon Cas Bonairiano no ta bai yama mas pa puntra ken si i ken no ta deseá un kas. E buskadó di kas mes ta bira responsabel pa reakshoná riba disponibilidat. Nos hürdónan tambe mester bai hasi uso di Mi FCB ku nan aktivá pa por komuniká ku FCB pa diferente petishonnan. Por ehèmpel duna un keho tékniko òf keho sosial, pidi deskuento temporal (supsidio di hür) òf kambia datos personal. E kondishon pa por hasi uso di tur e fasilidatnan ku e wèpsait ta ofresé ta ku tantu e buskadó komo e hürdó di kasnan di FCB tin ku subi e wèpsait i registrá ku un meil korekto i bálido. Durante e dos simannan aki Fundashon Cas Bonairiano lo bolbe pasa na e diferente emisora di radio i tambe televishon pa duna un splikashon amplio tokante di e último desaroyonan pa ku e wèpsait, rekordá e klientenan pa aktivá Mi FCB i tambe splika kiko tur ta e benefisionan ora ku aktivá e Mi FCB. Fundashon Cas Bonairiano lo tei e siguiente dianan aki na radio i televishon:
Dia - Radio/Televishon - Orario
13 sèpt. 2022 - Radio Bon FM, 08:00
14 sèpt. 2022 - Bonaire TV (aktualidat), 09:00
15 sèpt. 2022 - Radio Live 99.9, 11.00
19 sèpt. 2022 - Radio Flamingo 97.1, 08.15
21 sèpt. 2022 - Radio Bròkès, 16:00
22 sèpt. 2022 - Radio Breezy, 17:45
23 sèpt. 2022 - Nos TV Felis Mainta, 09.35
Trahadónan di Fundashon Cas Bonairiano ta disponibel na ofisina riba tur djabièrnè(sin sita) pa yuda klientenan ku tin difikultat òf ku no tin akseso na internèt pa aktivá nan Mi FCB. Pa yudansa durante otro dianan di siman por yama na 717-8042 òf manda un app na 796-6016 pa traha un sita. Pa e klientenan ku no tin meil, FCB ta yuda nan traha un meil. Pero tambe nos ta pidi ayudo di parti famianan serkano pa yuda den e parti di registrashon akí dor di por ehèmpel fasilitá e persona un meil i òf yuda e persona manehá su Mi FCB, naturalmente ku su pèrmit. Nos ta supliká tur nos klientenan, tantu esnan riba lista di espera pa un kas komo nos hürdónan i tambe tur interesado pa skucha e programanan i si mester di yudansa, no duda pa tuma kontakto. Pa 1 di desèmber 2022 tur buskadó di kas di FCB i hürdónan di kasnan di FCB mester a registrá i traha nan kuenta di Mi FCB.
![](https://static.wixstatic.com/media/ed029c_f9ed26f8e47a4f25bda202802f17b29b~mv2.jpg/v1/fit/w_207,h_206,q_75/ed029c_f9ed26f8e47a4f25bda202802f17b29b~mv2.jpg)