Fundashon Cas Bonairiano ta bai kuminsá pone kas riba wèpsait den luna di yüni 2024: yamada na klientenan riba lista di espera pa kas pa reakshoná
![](https://static.wixstatic.com/media/ed029c_58da4bf745c84197899e90809666861e~mv2.png/v1/fill/w_980,h_549,al_c,q_90,usm_0.66_1.00_0.01,enc_auto/ed029c_58da4bf745c84197899e90809666861e~mv2.png)
Yüni 2024
Despues ku FCB a lansa su wèpsait nobo www.fcb.live na mei 2022, tabatin diferente informashon ku a keda duna na nos klientenan enkuanto e posibilidatnan ku e wèpsait ta ofresé. Mediante “mediatour” durante na diferente radio i televishon a splika e motibunan dikon ta sumamente importante pa traha un kuenta privá di Mi FCB, pa por hasi uso di diferente servisio na un manera fásil i lihé.
Tambe a pone diferente dianan disponibel kaminda trahadónan di FCB a yuda klientenan traha un kuenta. Awor, 2 aña despues, e momentu a yega ku FCB ta bai pone su promé kasnan ònlain. Ta bon pa rekordá ku for di awor na momentu ku kasnan bira disponibel, FCB lo no bai yama mas pa puntra si ta interesá den un kas ku ta disponibel. Mediante di su kuenta di Mi FCB, e buskadó di kas i òf e hürdó ku ta deseá pa kambia di kas, mes mester bai reakshoná riba e kas ku e ta deseá, teniendo kuenta ku e kondishonnan deskribí huntu ku e kas, pa asina bini na remarke pa e kas ku ta disponibel. Pa por hasi esaki, buskadónan di kas mester keda pendiente di nan meil i òf korant EXTRA. Na momentu ku FCB pone un kas ònlain, outomátikamente e buskadó di kas lo risibí un meil di notifikashon ku ta inform’é ku tin kas disponibel. Klientenan ku tin un kuenta di Mi FCB mester tene kuenta ku ta sumamente importante pa keda chèk nan meil i òf kuenta di Mi FCB regularmente. Tambe lo pone un aviso den korant pa informá e grupo di klientenan ku no tin meil, ku tin kas disponibel.
Si tin un persona di edat grandi, òf un persona ku pa un òf otro motibu no ta hasi uso di internèt, FCB ta urgi familiar serkano i òf instansia kaminda e persona òf famia ta kliente, pa yuda te kaminda ku por. Por ehèmpel dor di yuda e kliente traha un kuenta di mi FCB i reakshoná riba kasnan disponibel.
FCB ta konsiente ku ta un sistema nobo pa Boneiru i ku tantu e trahadó di FCB komo e klientenan tin ku bai na kustumá ku esaki. Pero e sistema ta muchu mas efisiente i tur ku ta riba lista mes ta disidí si ke reakshoná riba un kas ku ta disponibel si òf no.
FCB a pone un tèblet ku internèt disponibel na ofisina pa buskadónan di kas por pasa durante orario di ofisina i reakshoná riba kasnan. Trahadónan di FCB lo ta disponibel na ofisina di FCB riba tur djárason di 8 or di mainta pa 12 or di mèrdia (sin sita) pa yuda klientenan ku mester di asistensia pa traha un kuenta di Mi FCB i pa reakshoná ònlain riba kas. Pa yudansa riba sobra dianan di siman, por yama na 717-8042 òf manda un app na 796-6016 pa traha un sita. Riba nos wèpsait por mira diferente video ku ta splika kon pa traha un kuenta di Mi FCB i kon pa reakshoná ònlain riba kasnan ku ta disponibel.