FCB ta firma 'Woondeal Bonaire 2023-2030' riba 28 di yüni 2023
![](https://static.wixstatic.com/media/ed029c_9e77ffb7206f4aa7ad3566b53293ca21~mv2.jpg/v1/fill/w_980,h_735,al_c,q_85,usm_0.66_1.00_0.01,enc_auto/ed029c_9e77ffb7206f4aa7ad3566b53293ca21~mv2.jpg)
Yüni 2023
Kolegio Ehekutivo di Bonaire, Ben Oleana di Fundashon Cas Bonairiano i Hugo de Jonge, minister pa Bibienda i Planifikashon urbano, a pone nan firma bou di e 'woondeal' pa Bonaire.
Komo anekso di e 'Woondeal', FCB a entregá un deklarashon di sosten na diputadonan Hennyson Thielman i James Kroon, i tambe na minister de Jonge. E 'woondeal' a keda firmá na e sitio na Hato, kaminda Fundashon Cas Bonairiano ta okupá ku konstrukshon di 254 kas. Ta trata aki di kasnan di hür sosial i un parti kasnan pa kompra na preis pagabel.
E kasnan ta ser trahá ku un sistema modular pa asina nan ta kla mas lihé. Rápido, pagabel i di bon kalidat. E meta ta pa realisá 2124 kas pagabel te ku 2030 na Bonaire. Minister De Jonge a pone € 10 mion disponibel pa e promé parti di e 'woondeal', ku lo hasi posibel konstrukshon di e promé 600 kasnan, inkluso infrastruktura, for di 2025. Aktualmente, ya ta konstruyendo intensivamente na Bonaire dor di Fundashon Cas Bonairiano. Te ku 2025 lo bin aserka 444 kas di hür sosial i kas pa kompra na preis pagabel. E señal pa komienso di konstrukshon di 600 kas for di 2025 a ser duná awor i den e último parti di e 'woondeal' lo añadí 1100 kas mas. Esaki ta suma 2124 kas pagabel mas aserka te ku 2030.
E poblashon ta oumentando drástikamente. Hopi hende ta buskando kas. Ademas, e preis di material pa konstrukshon a subi i kapasidat ta skars. Spesialmente hendenan ku un entrada abou i intermedio ta enkontrá difikultat pa haña un kas pagabel. Ku e 'woondeal' Bonaire, Kolegio Ehekutivo di Bonaire, FCB i minister De Jonge ta uni forsa pa trese un kambio den esaki. E 'woondeal' ta forma parti di ehekushon di e agènda di maneho pa Bibienda i Planifikashon urbano pa Karibe Hulandes. Esaki a ser publiká riba 22 di yanüari 2023.
![](https://static.wixstatic.com/media/ed029c_41ff1d1f5fb04849990b71253ddcbf17~mv2.jpg/v1/fit/w_207,h_206,q_75/ed029c_41ff1d1f5fb04849990b71253ddcbf17~mv2.jpg)
![](https://static.wixstatic.com/media/ed029c_d332293c12ed42e980b2abd632947510~mv2.jpg/v1/fit/w_207,h_206,q_75/ed029c_d332293c12ed42e980b2abd632947510~mv2.jpg)
![](https://static.wixstatic.com/media/ed029c_9e77ffb7206f4aa7ad3566b53293ca21~mv2.jpg/v1/fit/w_206,h_206,q_75/ed029c_9e77ffb7206f4aa7ad3566b53293ca21~mv2.jpg)
![](https://static.wixstatic.com/media/ed029c_c7a99a0fe3914d5e800ed64cb6cab4ac~mv2.jpg/v1/fit/w_207,h_206,q_75/ed029c_c7a99a0fe3914d5e800ed64cb6cab4ac~mv2.jpg)