16 partido ta firma deklarashon di intenshon Bibienda pa gruponan di enfoke vulnerabel
![](https://static.wixstatic.com/media/ed029c_61c7b90803f04762ae8b93492f0a51cc~mv2.jpg/v1/fill/w_980,h_484,al_c,q_85,usm_0.66_1.00_0.01,enc_auto/ed029c_61c7b90803f04762ae8b93492f0a51cc~mv2.jpg)
Aprel 2022
Djabièrnè tramèrdia 1 di aprel 2022 no ménos ku 16 partner di kadena i stakeholder a skirbi historia na Boneiru mediante firmamentu di e deklarashon di intenshon Bibienda pa gruponan di enfoke vulnerabel.
Siman pasá (28 di mart te 1 di aprel 2022) Entidat Públiko Boneiru den koperashon ku Fundashon Cas Boneriano a organisá e tayer Bibienda pa gruponan di enfoke vulnerabel.
Meta di e tayer akí tabata pa yega na un kolaborashon struktural pa yuda kuater grupo di enfoke vulnerabel, esta eks-detenidonan, víktimanan di violensia doméstiko, klientenan ku problemátika sikiátriko i studiantenan vulnerabel riba tereno di bibienda, kuido i guia, trabou i entrada, enseñansa i un ret di sosten sosial. I esaki a logra! E tayer tabata un éksito enorme i tur e 16 partidonan ku a partisipá a firma e deklarashon di intenshon.
Ta konosí kon doloroso e nesesidat pa bibienda sosial ta na Boneiru. E nesesidat pa bibienda ta afektá e gruponan mas vulnerabel den nos komunidat, manera e kuater gruponan ku nos a selektá pa e tayer akí, èkstra duru. Huntu ku e partnernan di kadena i stakeholdernan, Entidat Públiko Boneiru ke hasi di Boneiru un komunidat inklusivo. Realisashon di oportunidat igual pa tur hende ta posibel solamente ku e partidonan menshoná. E firmamentu akí ta nifiká ku Entidat Públiko Boneiru huntu ku e partnernan di kadena lo desaroyá un aserkamentu integral, ku lo benefisiá gruponan vulnerabel den nos komunidat den un forma duradero. Mirando e echo ku solamente yabi di un bibienda sosial no ta sufisiente pa e gruponan di enfoke menshoná, tur 16 partner di kadena ta koperá ku esaki. ‘Mi ta hopi orguyoso di loke huntu nos a logra pa Boneiru durante e dianan tras di lomba i kon entusiasmá i duru tur hende a traha pa logra esaki’, segun deklarashon di diputado Nina den Heyer, ‘konhuntamente nos a pone e prome paso importante na kaminda pa un aserkamentu integral duradero ku pa medio di bibienda, guia, trabou i entrada, enseñansa i un ret di sosten sosial, lo duna sosten na e miembronan di nos komunidat ku tin mas mester di esaki.’ ‘Ku koperashon di tur partido, nos ta konbensí ku nos lo ta kapas pa transformá e perspektiva pa futuro di nos gruponan vulnerabel strukturalmente i na un manera duradero for di un situashon sin speransa i ku tiki oportunidat pa un situashon ku hopi oportunidat i yen di potensial’, asina diputado den Heyer a agregá.
Partnernan di kadena ku a firma:
1. Entidat Públiko Boneiru: Kolegio Ehekutivo, Direktorado di Komunidat i Kuido, Departamento di Agrikultura, Krio di Bestia i Peska (LVV), Plenchi di Trabou.
2. Kuerpo Polisial Hulanda Karibense (KPCN) inkluso Ofisina Ayudo pa Víktima
3. Ministerio Públiko Boneiru (OM)
4. Instituto Hudisial Hulanda Karibense (JICN)
5. Fundashon Sentro Akseso Boneiru inkluso Guiami (Konseho i Punto di Notifikashon Violensia Doméstiko i Maltrato di Mucha) / Family Justice Center (FJC) i.o., Trabou Sosial, Prevenshon i Desaroyo di Bario, Kuido di Salú pa Hubentut, Ayudo den kaso di debe problemátiko i Relashon di Koperashon ‘Zorg- en Veiligheidshuis’
6. Stichting Reclassering Caribisch Nederland (SRCN)
7. Foundation Mental Health Caribbean (MHC)
8. Selibon
9. Stichting Krusada
10. Fundashon Formashon Pa Mayan (FORMA)
11. Stichting Raad Onderwijs Arbeidsmarkt (ROA)
12. Fundashon Rosa di Sharon (FRS)
13. Stichting Expertisecenter Onderwijs Zorg Bonaire (EOZ)
14. Scholengemeenschap Bonaire (SGB)
15. Stichting Jeugdwerk Jong Bonaire (JB)
16. Fundashon Cas Bonairiano (FCB)
![](https://static.wixstatic.com/media/ed029c_61c7b90803f04762ae8b93492f0a51cc~mv2.jpg/v1/fit/w_207,h_206,q_75/ed029c_61c7b90803f04762ae8b93492f0a51cc~mv2.jpg)
![](https://static.wixstatic.com/media/ed029c_fd722702f5de4b959dfa4c9f4af1ca24~mv2.jpg/v1/fit/w_207,h_206,q_75/ed029c_fd722702f5de4b959dfa4c9f4af1ca24~mv2.jpg)
![](https://static.wixstatic.com/media/ed029c_4c26e22937d24e0c9b9b116bae962db8~mv2.jpg/v1/fit/w_206,h_206,q_75/ed029c_4c26e22937d24e0c9b9b116bae962db8~mv2.jpg)
![](https://static.wixstatic.com/media/ed029c_92cec80cacfa49ffb5a5c789abae8110~mv2.jpg/v1/fit/w_207,h_206,q_75/ed029c_92cec80cacfa49ffb5a5c789abae8110~mv2.jpg)