Oumento anual di hür
Pa hürmentu di kas a stipulá reglanan ku a ser inkorporá den e lei nobo "Wet maatregelen huurwoningmarkt Caribisch Nederland" i e "Huurcommissie-Huurprijzenverordening". Den e último akí ta ser reglá kon ta kalkulá e preis di hür di bo kas i pa kua kasonan bo por aserká Komishon di hür.
Kálkulo di preis di hür
E preis di hür ta ser kalkulá segun un sistema di puntuashon kaminda ku kalidatnan di e kas ta ser balorá ku un sierto kantidat di punto. Pa kasnan di FCB tin dos kalidat ku ta konta: e superfísie di e kas i e bario kaminda ku e kas ta situá. E kantidat di punto ta ser totalisá i ta ser multipliká ku e preis pa punto, kua ta ser stipulá pa OLB. E resultado ta e preis di hür mensual.
Ku introdukshon di e lei- i ordenansa nobo akí pa 1 di aprel 2021 tin 3 situashon ku por presentá nan mes:
Scenario 1 - Posibel situashon
Bo preis di hür aktual ta ménos ku e preis di hür nobo
Scenario 1 - Konsekuensia
Konforme e areglo transitorio bo preis di hür lo ser oumentá anualmente ku 5% te na momentu ku alkansá e preis di hür nobo. E 5% akí ta pará lòs for di e indeksashon anual. E preis di hür lo ser oumentá entrante 1 di ougùstùs 2021 i despues anualmente riba 1 di yüli.
Scenario 2 - Posibel situashon
Bo preis di hür aktual ta ménos ku e preis di hür nobo pero e diferensha ta ménos ku 10%
Scenario 2 - Konsekuensia
Bo preis di hür ta keda igual
Scenario 3 - Posibel situashon
Bo preis di hür aktual ta mas haltu ku e preis di hür nobo
Scenario 3 - Konsekuensia
Bo preis di hür lo ser rebahá te na e preis di hür nobo entrante 1 di april 2021
Den kaso ku e preis di hür aktual ta ménos ku e preis di hür konforme e sistema di kalkulashon, e paso pa e preis di hür nobo lo tuma lugá gradualmente manera ta stipulá den e areglo transitorio di e ordenansa. Esaki ta nifiká ku e preis di hür lo ser oumentá anualmente ku 5% te na momentu ku alkansá e preis di hür nobo. E oumento anual di hür konforme e areglo transitorio ta pará lòs for di e indeksashon. Na momentu ku firma un kontrato di hür nobo, e preis di hür lo ser stipulá konforme e sistema di kalkulashon.
Komishon di hür
E Komishon di hür ta un komishon ku ta atendé eventual konfliktonan entre doño di kas i hürdó. E mihó solushon semper ta pa papia ku otro promé, detektá e problemanan pa asina nan por wòrdu solushoná. Si komo hürdó bo no ta logra sali afó ku e doño di kas, bo por akudí na Komishon di hür pa e siguiente kasonan:
-
E preis di hür di bo kas no ta rasonabel i e no ta konforme e lei- i stipulashonnan. Bo por laga Komishon di hür evaluá esaki dentro di 6 luna ku e kontrato di hür pa bo kas nobo a drenta na vigor;
-
Bo tin opyekshon kontra e oumento anual di hür pasobra esaki lo no ta konforme e lei- i stipulashonnan. Bo por laga Komishon di hür evaluá esaki dentro di 4 luna despues di e fecha ku e oumento di hür proponé mester drenta na vigor;
-
E doño di kas no a reakshoná riba bo karta den kua bo a pidi pa hasi reparashon na fayonan na e kas. Of e doño di kas no a hasi e reparashonnan na (sufisiente) satisfakshon. Bo por pidi Komishon di hür pa baha e hür temporalmente te na momentu ku e fayonan ser remediá. Den esaki mester ta trata di fayonan grave i hopi grave manera resumí den anekso III di e "Huurcommissie- Huurprijzenverordening".
Rebaho temporal riba e hür
Banda di e lei- i stipulashonnan menshoná ariba, lo drenta pronto na vigor e "Verhuursubsidieverordening". E ordenansa akí ta hasi posibel pa, ora bo entrada di famia no ta alkansá pa paga e hür, bo por hasi un petishon pa bin na remarke pa un rebaho temporal riba e hür. OLB a fiha un tabèl den kua ta stipulá e preis di hür den relashon ku e entrada di famia. A base di e tabèl aki por kalkulá kiko lo ta e rebaho temporal riba e preis di hür. E tabèl aki a ser restablese na yüli 2024. E punto di salida ta e salario mínimo. Aki abou ta e tabèl aktual di huur-inkomsten:
* E porsentahe máksimo pa gastunan di bibienda ta ser rebahá ku 0,5% pa kada yu menor di 18 aña ku ta biba den kas, en todo kaso ku ta wòrdu mantené pa mas ku 80% dor di e mayor i pa kada yu entre 18 i 23 aña di edat ku ta studiando 'fulltime'.
Si bo ta kere ku bo ta bin na remarke pa un rebaho temporal, bo por yena e formulario i entregué na FCB huntu ku pruebanan korespondiente. Nos lo evaluá bo petishon despues di kua bo ta risibí nos desishon ku si bo petishon a ser akordá. Asina ku e situashon finansiero den kas kambia, bo ta obligá di informá FCB di esaki i bo petishon lo ser evaluá di nobo.
