Paga hür
E hürdó tin un akuerdo di hür ku FCB i e tin ku paga su hür adelantá promé ku dia 5 di kada luna. Esaki ta nifiká ku e hür pa luna di desèmber mester ta pagá na prensipio di desèmber miéntras ku e hür pa luna di yüli mester ta pagá na prensipio di yüli. Lo no manda faktura mensualmente.
Anualmente, na prensipio di mart, e hürdó ta haña un karta indikando kiko e prèis di hür lo ta entrante e luna di yüli benidero. Huntu ku esaki ta bai un formulario. Si resultá ku, na bo opinion, basá riba e entrada di bo famia bo tin derecho riba un deskuento temporal for di e prèis di hür indiká (deskuento di hür), e ora ei bo por yena e formulario i entregué na FCB. E formulario lo ta optenibel onlain tambe.
Bo mes por disidí kon bo ta paga bo hür, kontal ku bo paga na tempu. Transferensha outomátiko òf retenshon riba salario via bo doño di trabou ta ser konsehá: e ora ei bo no tin ku pensa riba nada mas.
Direct Debet
E desaroyonan riba tereno di operashonnan di pago ta bai lihé, banko i otro institushonnan ke stòp ku transakshonnan ku plaka kèsh i apoderashonnan riba papel pasobra esakinan ta kosta tempu i plaka. Si ainda bo no a pasa over pa sistema di banko onlain, kisas bo por ta eksperensiando hopi molèster ku hasimentu di pagonan. FCB ke fasilitá kosnan pa abo komo kliente i ta pasa over desde awe pa uso di 'Direct Debet', tambe konosí komo kobransa outomátiko. Nos lo kuminsá promé ku e klientenan di MCB pero nos ta trahando pa hasi esaki posibel pa e klientenan ku un kuenta na RBC i Banco di Caribe tambe.
Bo por firma un formulario na FCB den kua bo ta apoderá FCB pa mensualmente kita e plaka di hür for di bo kuenta di banko. Den kaso ku bo a firma un areglo di pago, tambe bo por duna un apoderashon pa esaki. E ora ei bo no mester kibra kabes ku pagonan. Loke bo tin ku hasi ta di sòru pa tin sufisiente fondo riba bo kuenta pa evitá ku bo ta haña but serka Banko i tambe krea atraso den pago. Tambe ta posibel ku abo mes ta hinka un 'standing order' den bo sistema di 'Online Banking' pa e pago mensual di bo hür. Si bo mester di yudansa den esaki bo por tuma kontakto ku bo banko.
Prosesamentu di pagonan den atministrashon di FCB
E reglanan pa prosesamentu di pagonan no ta kos ku nos ta inventá, ta kosnan ku ta reglá den lèi. Si bo indiká kiko bo ta pagando presis, esaki lo wòrdu prosesá di e manera ei dor di FCB. Por ehèmpel si bo indiká ku bo ta pagando pa luna di aprel, nos ta prosesá bo pago komo pago di hür pa aprel. Si bo no indiká pa kiko bo ta pagando, e sistema lo prosesá bo pago riba e luna di hür ku ta pará habrí pa mas tantu tempu. Si bo a firma un apoderashon di banko, mayoria biaha ora di pago lo ser indiká ku bo ta pagando pa e luna koriente.
Atraso di hür
Na momentu ku bo tin un atraso di hür, FCB lo manda bo un rekordatorio, atvertensia òf mandato pa bo paga. Na momentu ku bo risibí un karta asina, ta importante pa bo tuma esaki na serio i tuma kontakto ku FCB mesora. Si bo mes no tuma kontakto, lo bo wòrdu aserká dor di nos empleado ku ta enkargá ku kobransa. Un atraso di hür por ser okashoná pa diferente motibu: pèrdè trabou, kambio den konstelashon di bo famia resultando den ménos entrada òf bo pago no a bai bon pa motibu di falta di fondo riba bo kuenta.
Kua sea e motibu, ta importante pa FCB ta na haltura di esaki. Den kaso di ménos entrada, nos por wak si bo ta bin na remarke pa un deskuento temporal riba e hür. Importante pa bo sa ta ku si bo no reakshoná riba kartanan i no kumpli ku palabrashonnan, esaki finalmente por kondusí na un petishon na korte pa desalohá bo kas. Ta algu ku naturalmente nos lo ke evitá.
Datonan di banko
![mcb.png](https://static.wixstatic.com/media/ed029c_efb9ef7469d74c94a7748f733464f8a4~mv2.png/v1/fill/w_48,h_48,al_c,q_85,usm_0.66_1.00_0.01,enc_auto/mcb.png)
Maduro & Curiel's Bank Bonaire (MCB)
Number di kuenta: 372.161.02
Number SWIFT: MCBKBQBN
![rbc.png](https://static.wixstatic.com/media/ed029c_b1d73c7108cf4f5d9021133fec33d44b~mv2.png/v1/fill/w_48,h_48,al_c,q_85,usm_0.66_1.00_0.01,enc_auto/rbc.png)
Royal Bank of Canada Bonaire (RBC)
Number di kuenta: 840.0000.023071468
Number SWIFT: RBTTBQBN
![bdc.png](https://static.wixstatic.com/media/ed029c_31c4c362b6074345b9855d6d399e1074~mv2.png/v1/fill/w_48,h_48,al_c,q_85,usm_0.66_1.00_0.01,enc_auto/bdc.png)
Banco di Caribe Bonaire (BDC)
Number di kuenta: 01509602169-01
Number SWIFT: BDCCBQBN